Numbers 14

Mipite in Lehdo

1Tua zanin mipite khempeuh nakpi-in kikoin a kap uh hi. 2Israel mite khempeuh in Moses le Aaron phunsan uh a, mipi buppi in amaute kiangah, “Egypt ahikeh hih Sehnel-gamah i vekin a sikhin hi hoh leng! 3Bang hangin TOPA in namsau a si dingin hih gamah hong paipih se hiam? I zi i tate galte mat ding hi ta hi. Egypt ah kileh kik le ung ko adingin hoihzaw lo ding ahi hiam?” a ci uh hi. 4Tua ciangin amaute in, “Makai khat teelin Egypt ah ciah kik ni,” a kici uh hi. ^a

5 Tua ciangin Moses le Aaron tua lai-a kikhawm mihonpite khempeuh mai-ah a boksuk uh hi. 6A gam ena paite lakah Nun tapa Joshua le Jephunneh tapa Caleb in a puansilh uh balkekin, 7Israel mipite tungah, “Gam ena ka va pai kawikawina uh leitang hoih mahmah hi. 8Eite tungah TOPA lungkim peuh leh amah in bawngnawi le khuaizu luanna tua gamah hong paipihin eite hong pia ding hi. 9TOPA langdo kei phot peuhmah dih ni. Tua gam mite kihta kei un, bang hang hiam cih leh amaute i zialmang pah na ding hi. Amaute kidalna siamang khin a, ahi hangin eite tawh TOPA a omkhawm hi. Amaute kihta peuhmah kei un,” a ci uh hi. ^b

10 Ahi hangin mipi bup in amaute suangin den a sawm uh hi. Tua ciangin Kikhopna Puanbuk a Israel-te khempeuh tungah TOPA minthanna a kilang hi. 11TOPA in Moses kiangah, “Hih mite in bang tanvei hong simmawhbawl ding uh hiam? Amaute laka ka bawlsa lim piandangte om napi amaute in bang tanvei hong um lo lai ding uh ahi hiam? 12Amaute, pulpi ka vatmangsak dinga, ka susia ding hi, ahi hangin nang, amaute sanga a lianzaw a thahat minam kong suaksak ding hi,” a ci hi. ^c

13 Moses in TOPA tungah, “Tua hi mawk leh tua thu Egypt mite in na za ding uh hi! Amaute lak panin nangma vang tawh hih mite na paikhiatpih ahi hi. 14Tua hi a, amaute in hih gama teng mite tungah tua thu a gen ding uh hi. TOPA aw, hih mite tawh na omkhawm lam za khin uh a, TOPA aw, amaute tawh kimaituahin na mu khin hi; amaute tungah nangma meii om a, amaute mai-ah sunin meiikhuam, zan in meikhuam-in na pai hi. 15Hih mite a vekin sih khatin na sihsak leh nang thu a za minamte in, 16‘TOPA in kiciama a khapsa gamah hih mite a paipih thei kei hi; tua ahi manin amaute gamlakah a go hi,’ ci ding uh hi. ^d

17 “Tu-in Topa aw, na hatnasa, na lahkhiatsa na thahatna hong zang kik in: 18‘TOPA heh haka, a itna kicingin, lehdona le mawhna a maisak hi. Amah in a khialte dan tuaksak loin a om kei hi; amah in a pate mawhna a tate tungah khangthum khang lina dongin dan a pia hi,’ ci-a na lahkhiatsa bang tektek ahi hi. 19Na itna a liatna tawh kizui-in hih mite mawhna, Egypt a nusiat ua kipan tuni dong na maisak bang tektekin hih mite mawhna maisak in,” a ci hi. ^e

20 TOPA in, “Nong nget bangin amaute ka maisak zo hi. 21Keimah a nungta Pasian ka hi a, TOPA minthanna in leitung buppi a dip zah khat in 22ka minthanna a mu mi le Egypt le gamlaka ka bawl lim lamdangte mu napi ka thu hong mang lo a, sawmvei dong hong zia-et teitei vialte - 23khat beek in kiciama a pate uh tunga ka khapsa gam a mu peuhmah kei ding uh hi. Kei hong simmawhbawlte khat beek in tua gam a mu peuhmah kei ding uh hi. 24Ahi hangin ka nasempa Caleb in lungsim dang nei-in a lungsim khempeuh tawh kei hong zui ahi manin ama paina gamah ka tungsak dinga, ama suante in tua gam a luah ding uh hi. 25Amalek-te le Canaan-te tua kuam tengah teng uh ahi manin zing ciangin kileh kik unla San Tuipi a paina lampi tawnin gamlak lamah dingkhia un,” a ci hi. ^f

26 TOPA in Moses le Aaron kiangah: 27“Hih migilo honpi in kei bang tanvei hong phunsan ding uh ahi hiam? Hih a phunhat Israel-te in hong mawhsaknate uh ka za khin hi. 28Tua ahi ciangin amaute kiangah, ‘Keimah a nungta TOPA ka hi a, na gen uh ka zak bang lianin no tungah na khempeuh ka hih ding hi; 29mi kisim lai-a kisim, kum sawmnih pan a tungsiah kei hong phunsan peuhmah hih gam sungah na luang uh a lum ding hi. 30Ka khut lamto-a na inn lam na dingun kong ciamsa leitangah Jephuneh tapa Caleb le Nun tapa Joshua longal note khat beek na tung kei ding uh hi. 31Galte in man ding na cih uh na tate uh note nialsa leitang ah puakin nuam ka sasak ding hi. 32Ahi hangin note pen - na luang uh hih gamlakah a lum ding hi. 33Note muanhuai lohna thuakin na tate uh kum sawmli sung - na luang uh hih gamlakah a lup dong, tuu cingin a om ding uh hi. 34Gam na et sung uh ni sawmlite ni khat tangin kum khat - kum sawmli sung na mawhna uh hangin na thuak ding uh a, note kong langbawlna bang tawh kibang hiam, cih na thei ding uh hi,’ ci hi. 35Keimah TOPA in ka gen khin zo a, kei langa a kithubup mi honpi tungah hihte ka hih pelmawh ding hi. Amaute in hih gamlak ah beina tuak ding uh a, hih lai ah si ding uh hi,” a ci hi.

36 Tua ciangin Moses in gam en dinga a sawl ciah kika a thu a sialamin zasak a, mipi honpi amah a phunsansak mite - 37a leitang thu a sia-a a zaksakna uh thuakin TOPA mai-ah pulpi in vat a, a si uh hi. 38Gam ena kuante lak panin Nun tapa Joshua le Jephunneh tapa Caleb a suakta uh hi. ^g

39 Moses in Israel-te khempeuh tungah hih thu a zaksak ciangin amaute nakpi takin a thum uh hi. 40A zing ciang zingsang tungin mualtung gam asang lamah a kahto uh hi. Amaute in, “I mawh zo hi. TOPA hong khapsa gamah paito ni,” a ci uh hi. ^h

41 Ahi hangin Moses in, “Bang hangin TOPA thupiak mang lo na hi uh hiam? Taksuak peuhmah kei nuteh! 42Pai to kei un, bang hang hiam cihleh note tawh TOPA a om kei hi. Na galte un hong zo ding uh hi; 43ahang in, Amalek-te le Canaan-te in tua lai-ah hong maituah ding uh hi. TOPA panin lampial khin na hi manun, amah note tawh omkhawm lo dinga, namsau-in na puk ding uh hi,” a ci hi.

44 Tua hi napi Moses ahi a, TOPA thukhun singkuang ahi zongin om lopi-in giahphual panin mualtung gam lam manawh in a kikhin teitei uh hi. 45Tua ciangin mualtung gama teng Amalek-te le Canaan-te kuansuk uh a, amaute simin Hormah dongah a sattuk uh hi. ⁱ